„Mér fannst allan tímann vera hálfgerður óraunveruleikablær yfir þessu prófkjörsstappi í kreppunni miðri, og hef sjálfsagt ekki staðið mig nógu vel í því sem þarf að standa sig vel í til að vera kosinn í prófkjöri,“ segir Mörður Árnason sem lenti í níunda sæti í prófkjöri Samfylkingarinnar í gær á bloggsíðu sinni.

Mörður segir að niðurstaðan hafi ekki verið eftir væntingum. Hann óskar engu að síður Jóhönnu Sigurðardóttur til hamingju með glæstan sigur í Reykjavíkurprófkjörinu og nýja fólkinu sem stóð sig vel, Sigríði Ingibjörgu, Skúla Helgasyni og Valgerði Bjarnadóttur.

„Í sporum Ellerts? var spurt í SMS-i í gærkvöld þegar úrslitin lágu fyrir, og væntanlega átt við 5. sæti norður. Kannski, og út af fyrir sig er það heiður fyrir mig að standa í sporum þeirrar glæstu æskuhetju minnar af Melavellinum. Vonandi bara maður skori þá! En þetta er ekki bindandi kosning, og má vera að aðrir hafi meiri áhuga á 5. norður en ég,“ segir Mörður.