Svein Harald Öygard seðlabankastjóri situr nú fund með Jens Stoltenberg, forsætisráðherra Noregs, í Seðlabankanum. Stoltenberg er staddur hér á landi vegna norrænnar ráðstefnu í tengslum við fjármálakreppuna en Stoltenberg átti meðal annars fund með Ingibjörgu Sólrúnu Gísladóttur, formanni Samfylkingarinnar, í gær.

Svein Harald sagði við blaðamenn að sér þætti það mikill heiður að Stoltenberg væri hans fyrsti gestur í Seðlabankann. Hann sagði að loknum blaðamannafundi í Seðlabankanum í morgun að það væri algjör tilviljun að þeir væru staddir hér á landi á sama tíma. Þeir sögðust vera gamlir skólabræður og hagfræðingar. Jens Stoltenberg ætlar að ræða við blaðamenn að loknum fundi hans og Öygard.