„Andófsfólk, sem vill berjast í pólitík, verður að koma sér saman um einn flokk. Bezt er, að sá flokkur sé á sama stað í litrófinu og Samfylkingin og Framsókn. Þar eru beztu fiskimiðin um þessar mundir,“ segir Jónas Kristjánsson, fyrrverandi ritstjóri, um hið pólitíska landslag í aðdraganda kosninga.

Jónas fjallar um það á vef sínum hvernig ný framboð geta barist í aðdraganda kosninga. Hann segir fjórflokkinn halda. Reynslan sýni að það sé pláss fyrir einn flokk að auki en ekki fleiri. „Íslandshreyfingin fiskaði ekki í síðustu kosningum, þótt málefnin væru góð. Hún hefur ekki fengið neinn hljómgrunn í skoðanakönnunum. Frjálslyndi flokkurinn slefaði inn á þing, en nær samkvæmt könnunum ekki inn manni í apríl. Fullreynt er með þessa tvo flokka, fiskuðu ekki í stjórnarandstöðu.“