Íslenskir bankar stofnuðu félög í skattaparadísum upphaflega til að stórir viðskiptavinir þeirra þyrftu ekki að greiða fulla skatta af söluhagnaði hlutabréfa á Íslandi. Íslensku bankarnir, mestmegnis viðskiptabankarnir þrír, stofnuðu mörg hundruð félög á Tortola-eyju, sem tilheyrir bresku Jómfrúreyjunum, á undanförnum árum.

Þetta kemur fram í sunnudagsblaði Morgunblaðsins sem segir að flest félögin hafi verið stofnuð í gegnum dótturfélög bankanna í Lúxemborg og langflest þeirra stofnuð af Kaupþingi þar í landi. Sum þessara félaga, sem voru 136 talsins, fengu leyfi til að starfa á Íslandi á árunum 2000 til 2008.

Íslensku bankarnir hófu upphaflega að stofna þessi félög til að stórir viðskiptavinir þyrftu ekki að greiða fulla skatta af söluhagnaði hlutabréfa. Til að komast hjá því að greiða 45 prósenta skattinn sáu margir stórir fjárfestar sér hag í því að geyma ávinninga af hlutabréfasölu í hlutafélögum sem voru skráð annarsstaðar en á Íslandi, meðal annars á Tortola-eyju, samkvæmt því sem fram kemur í Morgunblaðinu.

Eftir að lögum um skattlagningu á hagnað var breytt hvarf þetta skattahagræði. Engu að síður sé ákveðinn hagnaður enn fólginn í því að halda úti félögum í skattaparadísum og er hann helst tvennskonar, annarsvegar að dylja tekjur eða eignir sem eitthvað athugavert er við hvernig hafi myndast eða að fela raunverulegt eignarhald annarra félaga segja viðmælendur blaðsins.