Fulltrúar Samfylkingarinnar í velferðarráði Reykjavíkurborgar segja nýjar þjónustuíbúðir fyrir aldraða allt of dýrar fyrir tekjulága eldriborgara í Reykjavík.

Fulltrúar Samfylkingarinnar í velferðarráði lögðu fram bókun í tilefni þess að minnisblað um nýjar þjónustuíbúðir í Fróðengi var lagt fram.

Þar segir að velferðarsvið úthluti nú í sjö þjónustuíbúðir sem nýlega voru vígðar við Fróðengi og eru þar gjaldgengir þeir eldri Reykvíkingar sem ekki geta búið heima og þurfa aðstoð við útvegun húsnæðis.

Í tvær þessara íbúða kostar leigan 90-100 þúsund krónur á mánuði auk þjónustugjalds sem er 19.300.
Í fimm íbúðir af þessums jö er leigan 130-150 þúsund krónur á mánuði auk þjónustugjalds sem er sömuleiðis 19.300 krónur.

Fram kemur í bókun Samfylkingarmanna að fulltrúum finnist ekki boðlegt að bjóða upp á þjónustuíbúðir fyrir tekjulága eldri borgara í Reykjavík á verði sem er frá 110-170 þúsund krónur á mánuði með þjónustugjaldi.

„Hlutverk Reykjavíkurborgar er fyrst og fremst gagnvart þeim hópi. Eldri borgarar sem einungis hafa tekjur frá Tryggingastofnun ríkisins hafa útborgað á mánuði um 155 þúsund krónur,“ segir í bókuninni.