„Það ætti að greiða skatt af þessu,“ segir Aðalsteinn Hákonarson, forstöðumaður eftirlitssviðs ríkisskattstjóra, um tugmilljóna vinningsfé tveggja íslenskra pókerspilara sem hafa gert það gott á erlendum pókersíðum.

DV greindi frá því í dag að ungur pókerspilari úr Garðabænum vann 120 þúsund dollara, andvirði 14 milljóna króna, í pókerspili á erlendri vefsíðu. Annar íslenskur pókerspilari hefur unnið meira en 100 milljónir króna. Á móti kemur að báðir hafa bæði unnið og tapað fé í pókerspili og því er afrakstur þeirra ekki endilega jafn mikill og þessar tölur gefa til kynna.

„Svona mál hafa alltaf verið undir yfirborðinu,“ segir Aðalsteinn. „Yfirfærslurnar fara í gegnum bankakerfið og þar er regluverk sem athugar með peningaþvætti og annað. En maður veit ekki hvort þessu er skilað hingað heim. Það er þannig í skattaeftirlitinu að það verður aldrei hægt að ná öllu.“