Bjarni Benediktsson, formaður Sjálfstæðisflokksins og fyrrverandi stjórnarformaður BNT og N1, segist aldrei hafi komið nálægt neinni ákvörðun um að taka þátt í fjárfestingaverkefni eignarhaldsfélagsins Vafnings í fasteignaverkefni Sjóvár í Makaó. Vafningur keypti fasteignaverkefnið af dótturfélagi Sjóvár í í febrúar í fyrra og voru BNT og félög í eigu föður og föðurbróður Bjarna hluthafar í félaginu. Bjarni staðfestir jafnframt að hann hafi átt hlutabréf í BNT á fyrsta ársfjórðungi ársins 2008.

„Ég hef aldrei komið nálægt neinni ákvörðun um að taka þátt í fjárfestingaverkefni í Makaó,“ segir Bjarni Benediktsson, aðspurður um hvaða aðkomu hann hafi haft af kaupum Vafnings á háhýsinu í Makaó af dótturfélagi Sjóvár.

Aðspurður af hverju Bjarni hafi fengið umboð frá félögunum þremur sem voru í eigu fjölskyldu hans - BNT, Hrómundi og Hafsilfri - til að veðsetja hlutabréfin í Vafningi sama dag og félagið keypti turninn í Makaó segir Bjarni: „Þeir voru ekki staddir á landinu og báðu mig um það fyrir sína hönd að skrifa undir ákveðinn veðsamning þar sem þeir voru að veðsetja hlutabréfin sín,“ segir Bjarni en BNT, Hrómundur og Hafsilfur voru í eigu föður Bjarna, Benedikts Sveinssonar, og föðurbróður hans, Einars.

Aðspurður hvort Bjarni hafi ekki sjálfur átt hlutabréf í BNT á þessum tíma segir Bjarni: „Jú, en það er langt síðan,“ segir Bjarni og bætir því við að hann hafi átt bréfin á fyrsta ársfjórðungi ársins 2008. „En hvað kemur mér það við þó BNT eigi lítinn hlut í þessum félagi?“ segir Bjarni, sem var eins og áður segir, stjórnarformaður í BNT og N1 þegar Vafningur keypti fasteignaverkefnið í Makaó.

DV mun birta frekari umfjöllun um viðskipti Vafnings og aðkomu Bjarna Ben að félaginu á föstudaginn. Jafnframt mun DV birta gögn um aðkomu Bjarna að Vafningi þegar kaupin á turninum í Macau gengu í gegn.