Morgunblaðið greindi frá því á föstudaginn að ástralski leikstjórinn Benedict Andrews myndi leikstýra Lé konungi eftir Shakespeare hjá Þjóðleikhúsinu á næsta leikári. Margir þeirra sem stunda leikhúslífið hér á landi eru farnir að þykjast sjá ýmislegt sem Borgarleikhúsið gerir ganga aftur í líkri mynd í Þjóðleikhúsinu.

Opnar áheyrnarprufur fyrir söngleiki eru til dæmis nokkuð sem tíðkast hefur í fyrrnefnda leikhúsinu í langan tíma og ákvað Þjóðleikhúsið að bjóða upp á slíkt hið sama nýverið fyrir söngleikinn Óliver. Kynningarrit leikhússins við Hverfisgötuna fyrir þetta leikár þótti keimlíkt sams konar riti sem leikhúsið við Kringluna gaf út í fyrra, og gjörningurinn að fá erlendan leikstjóra til að leikstýra uppfærslu eru nýjustu líkindin. Síðastliðið sumar tilkynnti Borgarleikhúsið nefnilega að litháíski leikstjórinn Oskaras Koršunovas myndi stýra uppfærslu þess á Ofviðri Shakespeares um jólin 2010.