Í brýnu sló á milli stuðningsmanna stjórnarandstöðunnar og lögreglunnar í Tehran í Íran í dag, þegar þúsundir aðgerðasinna efndu til mótmæla gegn stjórn sem þeir telja ólöglega.

Óeirðalögreglan beitti táragasi og kylfum gegn mótmælendum við tvö helstu torg borgarinnar og öryggissveitir fylktu liði á götum úti og lokuðu aðgengi að háskólum. Samkvæmt fregnum hafa öryggissveitir hleypt af skotum upp í loftið, en tókst ekki að koma í veg fyrir að námsmenn mótmæltu á háskólalóðum í höfuðborginni og víðar í Íran.

Stjórnvöld lokuðu fyrir internetmiðla og farsímaþjónustu sums staðar, en engu að síður bárust nokkrar óskýrar myndir út fyrir landið. Á þeim mátti sjá sitjandi mótmæli, mótmælagöngur og gervijarðarfarir, og myndir sem sýna fólk brennandi myndir af Ali Khamenei erkiklerk og æðsta leiðtoga landsins.