Inntökupróf í KG-klúbbinn svokallaða fer fram á veitingastaðnum Ömmu Habbý á Ísafirði á miðvikudag. Til að standast inntökuprófið þurfa einstaklingar sem vilja komast í KG-klúbbinn að innbyrða eitt kíló af kjöti á innan við klukkustund. Ekki nóg með það heldur þarf að borða hnefafylli af meðlæti af eigin vali með. Þeir sem undirgangast þessa þolraun þurfa að að lúta ákveðnum reglum en í þeim felst að ekki er heimilt að kasta upp kjöti á meðan þolrauninni stendur og verður kjötið að vera eitt kíló af þyngd eftir eldun.

Ýmsir hafa þreytt þessa þolraun og staðist hana en aðrir hafa einfaldlega gefist upp. Varað er við ýmsum kvillum sem kunna að fylgja því að innbyrða svo mikið magn af kjöti á svo skömmum tíma en meðal þess er þarmastífla, þvagfæragigt, nýrnabilun, hjartaáfall og ýmis önnur mein sem geta hent þá sem reyna við inntökuprófið.

En vakna þó spurningar hvort að klúbbur sem gengur út á að éta óhóflegt magn af kjöti sé ekki rétti andinn á þessum síðustu og verstu tímum. Stofnendur KG-klúbbsins segjast geta fallið á þau sjónarmið en benda á að þetta sé til gamans gert og í raun ekkert frábrugðið því að ganga um í rándýrum tískufötum, klífa tinda eða drekka dýr vín. Allt er þetta viss afþreying sem flokka mætti sem óþarfa, bruðl og óhóf, segja forsprakkar klúbbsins.

Alls hafa fimm boðað komu sína í inntökuprófið en aldurstakmark er átján ár og þurfa þeir sem þreyta inntökuprófið að skrifa undir yfirlýsingu að þeir geri sér grein fyrir þeim kvillum sem þeir geta hlotið af því að borða svo mikið kjöt á svo skömmum tíma.