„Það er enginn klofningur hjá meirihlutanum í bæjarstjórn,“ sagði Guðmundur Þorgrímsson, formaður bæjarráðs Fjarðabyggðar, í samtali við DV en kvisast hefur út að Framsóknarmenn sem mynda meirihluta bæjarstjórnar Fjarðabyggðar ásamt Fjarðalistanum, séu klofnir í afstöðu sinni vegna áforma um að loka skrifstofu sveitarfélagsins í Neskaupstað um áramót en talið er að framtíð meirihluta samstarfsins gæti ráðist á meirihluta fundi sem hefst klukkan 20:00 í kvöld.

Málið er afar eldfimt í Fjarðabyggð og hefur Benedikt Sigurjónsson, fyrrverandi bæjarfulltrúi Framsóknar, sagt sig úr öllum ráðum og nefndum sem hann hefur átt sæti í fyrir Framsókn í Fjarðabyggð.

Bæjarráð Fjarðabyggðar samþykkti samhljóða að leggja niður skrifstofurnar á Norðfirði og sú ákvörðun var líka samþykkt fundi hjá meirihlutaflokkunum.
Helstu ástæður lokuninnar voru þær að um hagræðingu væri að ræða þar sem á næstu tíu til ellefu árum myndu sparast 160 milljónir króna. Einnig er ein af ástæðum fyrir lokun skrifstofunnar á Norðfirði sögð vera slæmt ástand húsnæðisins og er það sagt ekki halda vatni.