Í dag á alþjóðadegi fatlaðra veitti Öryrkjabandalag Íslands Hvatningarverðlaun ÖBÍ í þriðja sinn. Þau eru veitt til þeirra sem stuðlað hafa að einu samfélagi fyrir alla. Veitt voru þrenn verðlaun: til einstaklings, fyrirtækis og stofnunar, sem þykja hafa skarað fram úr og endurspeglað nútímalegar áherslur um jafnrétti, sjálfstætt líf og þátttöku fatlaðra í samfélaginu.

Dómnefnd komst að eftirfarandi niðurstöðu:

Í flokki einstaklinga, Edda Heiðrún Backman, fyrir mikinn styrk, kjark og áræðni í að bæta aðstöðu sjúkra og fatlaðra, m.a. með söfnunarátakinu „Á rás fyrir Grensás“.

Í flokki fyrirtækja, SÍBS – Samband íslenskra berkla- og brjóstholssjúklinga, fyrir fyrirmyndaraðgengi við SÍBS-húsið, Síðumúla 6.

Í flokki stofnana, Öskjuhlíðarskóli, fyrir að gera nemendur hæfa til þátttöku í samfélaginu á sem flestum sviðum eftir því sem geta þeirra leyfir.

Forseti Íslands, herra Ólafur Ragnar Grímsson afhenti verðlaunin en hann er verndari verðlaunanna.

Verðlaunaafhendingin fór fram í Salnum í Kópavogi að viðstöddu fjölmenni.