Fyrir örfáum dögum var Barack Obama Bandaríkjaforseta hrósað fyrir að opna það öngstræti sem loftslagsráðstefnan í Kaupmannahöfn var komin í og forsetaembættið staðfesti að Bandaríkin myndu vinna að því að draga úr losun gróðurhúsalofttegunda. Rúsínan í pylsuendanum var sú að Obama myndi koma við á ráðstefnunni á leið sinni til Oslóar þar sem hann mun taka við friðarverðlaunum Nóbels.

Víða um lönd mátti heyra andvörp léttis, enda hafði verið litið á þá staðreynd að Bandaríkin höfðu ekki sett sér markmið hvað varðaði losun gróðurhúsalofttegunda sem mögulega eina alvarlegustu hindrun fyrir pólitísku samkomulagi í Kaupmannahöfn.

Kaupmannahöfn í leiðinni
Allt væri þetta nú gott og blessað ef ekki væri fyrir þá staðreynd að erindi ferðalags Obama virðist ekki vera loftslagsráðstefnan og hugur hans virðist bundinn við aðra hluti, nánar tiltekið friðarverðlaun Nóbels sem honum verða afhent þann 10. desember í Osló. Gert er ráð fyrir að Obama muni heiðra starfsbræður sína í Kaupmannahöfn þann 9. desember og ekki talið líklegt að hann sameinist öðrum leiðtogum heims í að undirrita samkomulag um aðgerðir í loftslagsmálum í lok þessarar tveggja vikna ráðstefnu.

Nóbelsverðlaunin fá meiri umfjöllun
En í ljós hefur komið að erfitt getur reynst að útvega bandarískum blaðamönnum hótelherbergi í Kaupmannahöfn. Í tilkynningu frá ferðaskrifstofu Hvíta hússins sagði að einungis væri mögulegt að útvega einni tylft fréttamanna herbergi í Kaupmannahöfn og yrði þar um að ræða þá sem yrðu í fylgdarliði forsetans. Aðrir bandarískir fréttamenn fara til Oslóar og flytja Bandaríkjamönnum tíðindi af Nóbelsverðlaunahátíðinni.
„Það er ekki að við viljum ekki hafa þá [fréttamennina] þarna, en við höfum heyrt að nálægustu hótelherbergin sé að finna í Osló,“ var haft eftir talsmanni ferðaskrifstofu Hvíta hússins á vefsíðu Times.
Hótelrými í Kaupmannahöfn er fyrir margt löngu uppbókað, en hermt er að sendinefnd Bandaríkjanna á loftslagsráðstefnuna telji um sexhundruð manns.

Grár fyrir járnum
Barack Obama fær friðarverðlaun Nóbels meðal annars fyrir „stórkostlegt átak hans til að styrkja nærgætni í alþjóðasamskiptum og samstarf þjóða í milli“. Það má til sanns vegar færa að ekki var þörf á bættum samskiptum á alþjóðavettvangi þegar Obama tók við embætti, og sú þörf er að miklu leyti tilkomin vegna utanríkisstefnu forvera hans í starfi.
Engu að síður má segja að það skjóti skökku við að Barack Obama taki á móti friðarverðlaunum Nóbels með annarri hendi og auki við stríðsrekstur Bandaríkjanna með hinni. Obama tilkynnti í gær um fjölgun bandarískra hermanna í Afganistan. Fjölgunin nemur 30.000 hermönnum og þegar hún er fullkomnuð verður heildarfjöldi bandarískra hermanna í Afganistan kominn yfir 100.000.

Tvöföldun í valdatíð Obama
Með þeirri fjölgun verður fjöldi hermanna sem Obama hefur sent til Afganistan kominn í 55.000 og Obama kominn verður inn á nýjar lendur sem forseti Bandaríkjanna því þar með hefur hlutur Bandaríkjanna í stríðinu í Afganistan meira en tvöfaldast síðan Obama tók við embætti. Að auki mun ábyrgðin á árangri eða mistökum lenda á hans herðum af meiri þunga en hingað til. Reyndar kann hann að freistast til að skella skuldinni á forvera sinn, George W. Bush, og þá handvömm að leggja meiri áherslu á stríðið í Írak og vanrækja átökin í Afganistan.
Reiknað er með að fyrstu viðbótarhermennirnir komi til Afganistan í ársbyrjun, en það gæti liðið allt að einu og hálfu ári áður en allir viðbótarhermenn Bandaríkjanna verða komnir til Afganistan.