Ragna Árnadóttir, dóms- og mannréttindaráðherra, verður í stóru hlutverki í Grensáskirkju á nýársdag. Þá er hátíðarguðsþjónusta í kirkjunni og sér Ragna um predikunina. Hún lýsti því eitt sinn í viðtali í Morgunblaðinu að hún væri trúuð og teldi trúna mikilvæga fyrir landsmenn og endurspeglast það kannski í predikun hennar.

Annars eru fleiri landsþekktir einstaklingar í stórum hlutverkum í Grensáskirkju yfir hátíðarnar. Geir Jón Þórisson er maður ekki einhamur. Fyrir utan að standa upp úr hvar sem hann fer og sérstaklega við skyldustörf hefur hann vakið athygli fyrir að vera trúmaður mikill. Geir Jón er líka söngmaður og syngur einsöng við hátíðarguðsþjónustu þegar jólahátíðin gengur í garð.