Jón Þorsteinn Jónsson, fyrrverandi stjórnarformaður Byrs, er með réttarstöðu sakbornings í rannsókn sérstaks saksóknara, Ólafs Haukssonar, á viðskiptum einkahlutafélagsins Exeter Holding, samkvæmt heimildum DV. Hann er einn af fáum sem vitað er að hafi fengið réttarstöðu sakbornings í rannsóknum sérstaks saksóknara á íslenska efnahagshruninu. Jón Þorsteinn hefur verið úrskurðaður í farbann vegna málsins.

Embættið rannsakar hvort auðgunarbrot og umboðssvik hafi átt sér stað í málinu sem snýst um tvær lánveitingar upp á 1,4 milljarða króna sem Byr veitti til eignarhaldsfélagsins Tæknisetur Arkea/Exeter Holding í október og desember 2008. Lánið til Arkea var notað til að kaupa stofnfjárbréf stjórnarmanna og starfsmanna Byrs í sparisjóðnum, meðal annars bréf Jóns Þorsteins, á yfirverði. Veðið fyrir láni Exeter var að öllu leyti í stofnfjárbréfunum sem keypt voru.