Betur fór en á horfðist þegar tvær bifreiðar skullu framan á hvor aðra á Moldhugahálsi, rétt norðan við Akureyri, á áttunda tímanum í kvöld. Um var að ræða amerískan pallbíl og fólksbíl og var ökumaður fólksbílsins fluttur á slysadeild.

Að sögn lögreglu er vont veður á svæðinu og var töluverð ísing á veginum þegar slysið varð. Ökumaður fólksbílsins var fluttur með sjúkrabíl á slysadeild og kvartaði hann undan verkjum í brjósti. Loka þurfti veginum um stundarsakir vegna slyssins.

Sex voru í pallbílnum og voru þau öll flutt til skoðunar á slysadeild. Að sögn lögreglu er ekki talið að neinn þeirra hafi slasast. Ökumaður fólksbílsins var einn á ferð.