Eva Joly, ráðgjafi sérstaks saksóknara, segir það fullkomlega eðlilegt að kyrrsetja eignir manna og úrskurða þá í farbann meðan verið að rannsaka meint brot þeirra. Joly áritaði 200 eintök af bók sinni Hversdagshetjur í Eymundsson í Austurstræti í dag.

Eva Joly sagði í kvöldfréttum RÚV að kyrrsetning eigna, líkt og í tilfelli Baldurs Guðlaugssonar, fyrrverandi ráðuneytisstjóra, og farbannn Jóns Þorsteins Þorsteinssonar, fyrrverandi stjórnarformanns Byrs, séu eðlileg úrræði í glæparannsókn. Segir hún að mikilvægt sé að menn hverfi ekki á brott meðan verið er að rannsaka mál þeirra og í efnahagsbrotamálum sé mikilvægast að fara á eftir peningunum.

Þá sagði Eva að átta mánaða fangelsisdómur tveggja fyrrverandi starfsmanna Kaupþings séu hugsanlega það sem koma skal fyrir aðra sem leiddir verða fyrir dóm.