Stefán Hilmar Hilmarsson, fjármálastjóri 365 miðla og fyrrverandi framkvæmdastjóri Baugs Group, gerir tuttugu og fimm milljóna króna launakröfu í þrotabú Baugs Group. Stefán er eiginmaður Friðriku Hjördísar Geirsdóttur sem er kynnir í Wipeout-þáttunum.

Krafa Stefáns samanstendur af launum vegna sex mánaða uppsagnarfrestar, bílahlunninda og uppsöfnuðu orlofi. Málið var tekið fyrir í Héraðsdómi Reykjavíkur á föstudag en skiptastjóri þrotabús Baugs telur að Stefán hafi ekki átt rétt á þessum launum þar sem hann hafi verið framkvæmdastjóri þess.

„Ég er einfaldlega að reyna að sækja launin mín. Mér finnst leiðinlegt að þurfa að fara dómstólaleiðina en ég hef fulla trú á því að krafa mín nái í gegn,“ segir Stefán.