46 ára Breti, Paul Harvey, hefur verið ákærður fyrir að drepa eiginkonu sína með sjónvarpsfjarstýringu. Höfðu hjónin verið að rífast og henti Harvey að endingu sjónvarpsfjarstýringunni í hnakkann á eiginkonu sinni. Lenti hún á slagæð sem sprakk og lést eiginkona hans, Gloria Laguna, örskömmu síðar.

Málið var tekið fyrir hjá breskum dómstólum í gær. Lögmaður Harvey, Jonathan Goldberg, segir að það hafi ekki verið markmið hans að drepa eiginkonu sína. „Það eina sem hann gerði var að henda fjarstýringunni í hana. Á einhvern ótrúlegan hátt lenti hún akkúrat á þeim punkti þar sem hún var veik fyrir,“ segir hann.