Elin Nordegren, eiginkona kylfingsins Tigers Woods, hefur ákveðið að sækja um skilnað. Þetta er fullyrt í bandarískum fjölmiðlum í dag. Ætlar Nordegren að sækja um skilnað frá Woods á nýju ári vegna framhjáhalds hans.

Náin vinur Nordegren sagði í samtali við MSNBC-sjónvarpsstöðina í gær að Nordegren væri sterk kona og eiginmaður hennar hefði orðið henni, fjölskyldu hennar og sjálfum sér til skammar.

Í gær var greint frá því að Nordegren hefði sést án giftingarhringsins á dögunum. Þá hefðu flutningamenn sést bera út kassa af heimili þeirra hjóna. Þótti það renna stoðum undir þær kenningar að Nordegren hefði fengið sig fullsadda af fréttum af framhjáhaldi hans.

Þá segir ónafngreindur heimildamaður í samtali við People-tímaritið að Nordegren hefði þegar hitt skilnaðarlögfræðing. „Hún er búin að ákveða sig. Hann (Tiger Woods) mun ekkert breytast.“