Héraðsdómur Suðurlands hefur dæmt karlmann í 45 daga skilorðsbundið fangelsi fyrir líkamsárás. Var manninum gefið að sök að hafa ýtt harkalega við stelpu fyrir utan veitingastaðinn Lundann í Vestmannaeyjum þann tíunda janúar síðastliðinn.

Stúlkan féll aftur fyrir sig og skall með hnakkann í götuna með þeim afleiðingum að hún missti meðvitund, hlaut brot í hnakkabeini og blæðingu inn á heila. Við skýrslutöku hjá lögreglu sagði maðurinn að stúlkan hefði gengið að honum og byrjað að svívirða föður hans.

Héraðsdómur taldi sannað að maðurinn hefði ýtt við stúlkunni og þótti hæfileg refsing fangelsi í 45 daga. Dómurinn er skilorðsbundinn til tveggja ára. Þá var manninum gert að greiða konunni rúmar 700 þúsund krónur í skaða- og miskabætur.