Hæstiréttur dæmdi í dag karlmann, fæddan 1985, í 20 mánaða fangelsi fyrir kynferðisbrot gegn 14 ára stúlku. Maðurinn var 22 ára þegar brotin áttu sér stað í janúar 2008.

Maðurinn og stúlkan höfðu verið í sambandi á MSN-spjallforritinu fyrir atvikið og þótti Hæstarétti sýnt að maðurinn hefði haft einbeittan ásetning til að eiga kynferðisleg samskipti við stúlkuna þótt honum væri ljóst að hún væri einungis 14 ára gömul.

Samkvæmt læknisvottorði býr hún við væga þroskahömlun. Þótti Hæstarétti sýnt að maðurinn hefði brotið gróflega gegn stúlkunni þegar hann lét hana hafa við sig munnmök og síðan haft við hana endaþarmsmök, og hann ætti sér engar málsbætur.

Þá var hann einnig fundinn sekur um að hafa haft barnaklám í vörslum sínum.

Auk þess að vera dæmdur í 20 mánaða fangelsi var manninum gert að greiða fórnarlambinu 600.000 krónur í miskabætur.