Breska ríkisútvarpið sætir nú harðri gagnrýni eftir að slagari rokkhljómsveitarinnar Rage Against the Machine, Killing In the Name, var spilaður í morgunþættinum Radio 5live Breakfast laust fyrir klukkan 9 í morgun. Óheflað málfar í texta lagsins fór víst gríðarlega fyrir brjóstið á Bretum en tvær milljónir manna voru að hlusta þegar lagið fór í loftið.

Til að skilja afhverju BBC var að spila þennan slagara frá árinu 1992 þá ber að minnast á að Facebook-hópur hefur ákveðið að þessi jólin skuli ekki enn eitt lag frá X-Factor stjörnu toppa vinsældarlistana. Hefur hópurinn því ákveðið að koma lagi Rage Against the Machine á topp listans á nýjan leik og í tilefni þess voru Zach de la Rocha og félagar hans í sveitinni í viðtali í þættinum í morgun.

Þeim var síðan boðið að spila lagið, sem gerði allt vitlaust í upphafi tíunda áratug síðustu aldar, í beinni útsendingu.

En innan skamms kom að þeim kafla lagsins þar sem söngvarinn Rocha byrjar ítrekað að öskra: „Fuck you, I won't do what you tell me“ og þá fóru viðvörunarbjöllurnar að hringja hjá BBC-mönnum.

Útvarpskonan Shelah Fogarty brást ókvæða við og stöðvaði spilun lagsins og mátti heyra hana öskra: „Komið þessu úr loftinu!“

Fogarty bað síðan hlustendur afsökunar á svívirðingunum og sagði að hætta hafi þurft spilun lagsins því „það varð allt í einu eitthvað allt annað en við bjuggumst við.“

„Reyndar bjuggumst við við þessu, en við báðum þá margoft um að blóta ekki í laginu, en þeir gerðu það samt,“ segir Fogarty og hvatti þess í stað fólk til að kaupa smáskífu X-Factor stjörnunnar Joe McElderry.

Meira að segja George Michael varð fyrir því á dögunum að segja F-orðið í beinni útsendingu og fékk bágt fyrir hjá yfirmönnum BBC.