Einn fremsti ísklifurkappi heims, Guy Lacelle, lést í gær eftir að hafa lent í snjóflóði á fjalli í suðvesturhluta Montana í Bandaríkjunum. Lacelle, sem var kanadískur, var að fara upp gilskorning þegar hópur manna fyrir ofan hann kom af stað snjóflóði sem féll á hann.

Lacelle hafði skapað sér nafn sem einn besti ísklifurkappi heimsins og hafði hann unnið fjölmargar keppnir á ferli sínum, auk þessa að fara ótroðnar slóðir í leiðöngrum sínum. Hann var 54 ára og lætur eftir sig eiginkonu.