Skilanefnd Glitnis hótaði því að fara í mál við Bjarna Ármannsson, fyrrverandi bankastjóra Glitnis. Þess vegna ákvað Bjarni að endurgreiða bankanum 600 milljónir króna eins og greint var frá í gær. Hótaði skilanefndin að leita réttar síns og fá samningi þeim sem Bjarni gerði við fyrrverandi stjórn Glitnis um sölu á bréfum hans í bankanum á yfirverði rift.

Þetta kom fram í kvöldfréttum Stöðvar 2 í kvöld.

Árni Tómasson, formaður skilanefndar Glitnis, staðfesti þetta í samtali við Stöð 2. Bankinn notaði nýfallinn Hæstaréttardóm í máli Vilhjálms Bjarnasonar sem vopn. Þar var tekist á um kaup bankans á hlutabréfum Bjarna og sagði Árni að þar hafi komið skýrt fram að félagið sjálft gæti leitað réttar síns gagnvart áðurnefndum gjörningi. Því hafi nefndin ákveðið að sækja að Bjarna.