98 ára gömul kona hefur verið ákærð fyrir að myrða 100 ára gamlan herbergisfélaga sinn á hjúkrunarheimili í New Bedford í Massachusetts í Bandaríkjunum.

Lík hinnar hundrað ára gömlu Elizabeth Barrow fannst í herberginu þann 24. September síðastliðinn og var búið að vefja plastpoka utan um háls hennar. Leikur grunur á að herbergisfélagi hennar, hin 98 ára gamla Laura Lundquist, hafi kæft hana.

Í fyrstu grunaði lögreglu að konan hefði fyrirfarið sér en eftir að krufning var framkvæmd á líkinu kom í ljós að hún hafði verið myrt. Sonur Barrow segir í samtali við Fox News að Lundquist hafi kvartað yfir móður hans vegna tíðra heimsókna fjölskyldumeðlima hennar. Þá hafi hún margsinnis hótað henni.

Konurnar höfðu verið herbergisfélagar í ár og segir sonur hinnar látnu að hann hafi margsinnis beðið starfsfólk um að móðir hans yrði flutt í annað herbergi. Starfsfólkið svaraði því hinsvegar alltaf til að þeim kæmi mjög vel saman. Nú hefur lögregla gefið út ákæru á hendur Lundquist vegna morðsins á Barrow.