Katrín Jakobsdóttir, mennta- og menningarmálaráðherra, fer fram á fullnægjandi skýringar af hálfu forsvarsmanna Knattspyrnusambands Íslands, KSÍ, vegna heimsóknar fjármálastjóra samtakanna á strippstað í Sviss. „Við viljum fá það á hreint hvernig þetta geti hreinlega gerst,“ segir Katrín sem sendir KSÍ formlegt erindi síðar í dag.

Pálmi Jónsson, fjármálastjóri KSÍ, glataði 3,2 milljónum króna, á þáverandi gengi, af kreditkorti sínu og KSÍ á súlustaðnum Rauðu myllunni, Moulin Rouge, í Zürich í Sviss árið 2005. Það hefur verið staðfest að Pálmi heimsótti staðinn en hann fullyrðir að milljónirnar hafi verið teknar af kortunum í leyfisleysi.

„Við óskum eftir skýringum á þessu enda er þetta mjög skrítið allt saman. Að fjármálastjórinn sé með kort samtakanna á stað sem þessum er ekki í lagi. Viðkomandi var auðvitað í opinberri ferð og starfsfólk samtakanna gegnir hlutverki fyrirmynda. Í ljósi þess að samtökin gegna mikilvægu uppeldishlutverki, og þiggja auðvitað almannafé, þá viljum við fá fullnægjandi skýringar á þessu atviki,“ segir Katrín.