Pálmi Jónsson, fjármálastjóri Knattspyrnusambands Íslands, KSÍ, lýsir alfarið yfir sakleysi sínu um viðskipti við súlustað í Sviss. Femínistafélag Íslands krefst afsagnar stjórnenda KSÍ sem gefa lítið út á málflutninginn. Ævintýrið kostar Pálma nærri tvær milljónir króna sem hann segir dýrt spaug.

„Ég er algjörlega saklaus, það er alveg á hreinu. Af minni hálfu fóru þessi viðskipti ekki fram heldur var kortið misnotað. Ég hef ekki verið að stunda svona staði, þekki ekkert hvað þar fer fram og drekk ekki einu sinni kampavín,“ segir Pálmi Jónsson, fjármálastjóri Knattspyrnusambands Íslands, KSÍ.

Pálmi glataði 3,2 milljónum króna, á þáverandi gengi, af kreditkorti sínu og KSÍ á súlustaðnum Rauðu myllunni, Moulin Rouge, í Zürich í Sviss árið 2005. Sé upphæðin reiknuð á núverandi gengi nemur upphæðin nærri 8 milljónum. Það hefur verið staðfest að Pálmi heimsótti staðinn en hann fullyrðir að milljónirnar hafi verið teknar af kortunum í leyfisleysi. Eftir að kortanotkunin kom í ljós lýsti Pálmi strax yfir sakleysi sínu og bauð KSÍ til að borga brúsann. Í kjölfarið höfðaði hann mál úti í Sviss og krafðist endurgreiðslu þeirra 3,2 milljóna króna sem rukkað var um. Af þeim voru 1,5 milljónir bakfærðar en eftirstöðvarnar, tæpar tvær milljónir, þarf Pálmi að greiða.