Lögreglumaður á Húsavík þurfti að leita sér aðstoðar læknis eftir að hann var sleginn í andlitið af ölvuðum manni sem lögregla hafði afskipti af. Atvikið átti sér stað snemma í morgun en lögregla hafði fengið tilkynningu um að maðurinn léti ófriðlega og væri auk þess ofurölvi.

Að sögn lögreglunnar á Húsavík var maðurinn færður í fangaklefa en þegar þangað var komið réðst maðurinn á lögregluþjóninn og gaf honum hnefahögg í andlitið. Lögreglumaðurinn er óbrotinn eftir atvikið en þó blár og marinn. Árásarmaðurinn, sem er 33 ára, hefur áður komið við sögu lögreglu og má búast við kæru fyrir árásina.