„Þetta er lítil hreyfing í rétta átt,“ segir Vilhjálmur Egilsson, formaður Samtaka atvinnulífsins, um stýritvaxtaákvörðun peningastefnunefndar Seðlabankans. Nefndin ákvað að lækka stýrivextina úr tólf prósentum niður í ellefu prósent.

„Ég hefði viljað sjá vextina lækka meira og það þarf að taka miklu djarfari skref,“ segir Vilhjálmur. Hann segir að stýrivextir hefðu þurft að fara niður í eins stafs tölu og vaxtamunur milli Íslands og evrusvæðisins sé of mikill.

„Við erum ekki að sjá fyrirtæki fjárfesta mikið við svona fjármagnskostnað. Vaxtastigið í landinu þarf að lækka mikið,“ segir hann og bætir við að þegar fyrirtæki séu ekki að fjárfesta sé ekki heldur verið að skapa atvinnu fyrir þá sem á henni þurfa að halda.