Breska lögreglan, Scotland Yard, leitar nú að manni sem grunaður er um að hafa nauðgað 23 ára gamalli konu á heimili hennar. Árásin var mjög hrottafengin, ekki síst í ljósi þess að þriggja ára gamall sonur konunnar fylgdist með árásinni.

Breska blaðið Telegraph greinir frá þessu í dag en þar kemur fram að konan hafi mælt sér mót við manninn þann 30. september, skammt frá Sutton í Suður-Lundúnum. Konan kynntist manninum á Netinu og ákváðu þau að fara heim til konunnar til að fá sér te.

Maðurinn er sagður hafa ráðist skyndilega á konuna, kýlt hana í andlitið með þeim afleiðingum að hún missti meðvitund og nauðgað henni síðan. Þrátt fyrir mikla leit hefur hún engan árángur borið og hefur breska lögreglan því leitað til almennings vegna málsins.