Aðeins um 29 prósent Íslendinga segjast vera mjög eða frekar hlynntir inngöngu Íslands í Evrópusambandið en 54 prósent segjast vera mjög eða frekar andvígir því. Þetta kemur fram í nýrri könnun sem Rannsóknarmiðstöð Háskólans á Bifröst vann fyrir fréttastofu Stöðvar 2.

Í kvöldfréttum Stöðvar 2 sagði að um helmingur aðspurðra hafi verið hlynntur aðildarviðræðum við Evrópusambandið en tæp 43 prósent hafi verið andvígir viðræðum. Sjö prósent hafi ekki tekið afstöðu.
Þegar spurt var um afstöðu til inngöngu í ESB voru fleiri sem ekki tóku afstöðu eða tæp 17 prósent. 29 prósent voru hlynntir en 54 prósent andvígir eins og áður segir.

Könnunin var gerð dagana 26. október til 3. nóvember. Þátttakendur voru 859 og svarhlutfall um 65 prósent.