Tiger Woods segist vera aumur eftir slysið sem hann lenti í á föstudagsmorgun og harmar þær ljótu lygasögur sem spunnist hafi í kringum atvikið þegar hann klessti lúxusjeppa sínum á tré fyrir utan heimili sitt.

Tiger tjáir sig í yfirlýsingu sem sett var inn á heimasíðu hans nú í kvöld. Annan daginn í röð hefur hann hins vegar neitað að hitta lögregluna sem vill yfirheyra hann vegna málsins.

Lögreglan hefur birt neyðarlínusímatalið þar sem nágranni Tigers tilkynnir um slysið.

Tiger segir í yfirlýsingu sinni að slysið sé algjörlega honum að kenna, það sé neyðarlegt fyrir sig og fjölskyldu hans.

„Þetta er einkamál og þannig vill ég halda því. Þó ég skilji að fólk sé forvitið þá afsakar það ekki þá fjölmörgu ósönnu, óstaðfestu og illgjörnu orðróma sem nú ganga um mig og fjölskyldu mína. Þessi umræða er óábyrg.

Eina manneskjan sem ber ábyrgð á þessu slysi er ég. Eiginkona mín, Elin, sýndi af sér fádæma hugrekki þegar hún sá að ég var slasaður og í vanda. Hún var fyrsta manneskjan til að koma mér til hjálpar. Allar fullyrðingar annars eðlis eru algjörlega ósannar,“ segir Tiger Woods í yfirlýsingunni.

Hann segir atvikið hafa verið erfitt fyrir hann og eiginkonu sína, sem og fjölskyldu hans.

„Ég er þakklátur fyrir allan þann stuðning og heillaóskir sem ég hef fengið. En ég yrði þakklátur fyrir ef fólk gæti skilið að ég og fjölskylda mín þurfum að fá að eiga okkar mál fyrir okkur sjálf sama hversu ágengt sumt fólk getur verið,“ segir Tiger að lokum.