Litlu mátti muna að illa færi er ökumaður á leið um Ártúnsbrekku missti stjórn á bifreið sinni í hálkunni. Bifreiðin fór á all nokkrum hraða yfir umferðareyju sem skilur að umferð í austur og vestur og endaði á þeirri akrein sem var fjærst umferðareyjunni.

Bifreiðin hringsnerist á akbrautinni og hefði ekki verið fyrir snarræði ökumanna sem komu úr gagnstæðri átt hefði geta farið illa. Bifreiðin stöðvaðist fáeina metra fyrir framan fremstu bifreiðarnar sem komu keyrandi á móti henni.

Þá missti ökumaður fólksbifreiðar stjórn á bifreið sinni á Hringbraut og ók í gegnum girðingu við brautina. Lögreglan á höfuðborgarsvæðinu segir nokkuð um að bifreiðareigendur séu ekki búnir að láta bifreiðar sínar á vetrardekk.

Hvetur lögregla fólk til að vera ekki umferðinni á illa útbúnum bílum í hálkunni sem nú er á höfuðborgarsvæðinu. Þó er búið að salta allar helstu stofnbrautir á höfuðborgarsvæðinu en búast má þó við einhverri hálku á þeim.