Aðventuhátíð á Austurvelli í Reykjavík hefst klukkan fjögur í dag þar sem ljósin á Óslóartrénu verða tendruð. Athöfnin hefst með því að Dómkórinn syngur nokkur lög undir stjórn Marteins Hunger Friðrikssonar. Á eftir söngnum flyturMargit F. Tveiten, norski sendiherrann, stutt ávarp. Þá tekur borgarstórinn í Reykjavík, Hanna Birna Kristjánsdóttir, við jólatré sem er gjöf Oslóarborgar til Reykvíkinga. Það er Aud Kvalbein, varaborgarstjóri Oslóarborgar sem afhendir tréð, en það var höggvið 16. nóvember og sent til Íslands. Norsk-íslenska stúlkan, Hrafnhildur Sif Ingólfsdóttir, 8 ára, tendrar svo jólaljósin á trénu.

Tréð verður að venju fagurskreytt ljósum en að auki mun Ketkrókur, jólaórói Styrktarfélags lamaðra og fatlaðra 2009 prýða tréð. Ketkrókur er fjórði óróinn í jólasveinaseríu Styrktarfélagsins en fyrri óróar félagsins hafa prýtt tréð síðustu ár. Vöruhönnuðurinn Hrafnkell Birgisson og rithöfundurinn Gerður Kristný lögðu Styrktarfélagi lamaðra og fatlaðra lið í ár við hönnun jólaóróans, Ketkróks. Hrafnkell hannaði óróann en Gerður Kristný orti kvæði sem fylgir óróanum. Gerður Kristný mun frumflytja þetta kvæði á Austurvelli og mun Hrafnkell á sama tíma krækja hangilæri upp úr potti og skera með óróanum.

Þá koma Bangsi litli úr Dýrunum í Hálsaskógi og Ljónið úr Galdrakarlinum í Oz í heimsókn og fá viðstadda til að hugsa um hvað það er sem skiptir máli.

Að lokum koma þrír hressir jólasveinar sem hafa laumast til byggða og ætla að heilsa upp á krakkana á Austurvelli ef mamma þeirra verður ekki búinn að ná þeim.

Dagskránni lýkur um 16:45

Gerður G. Bjarklind er kynnir og dagskráin er öll túlkuð á táknmál.