Dæmi er um að íslenskur karlmaður, sem tekið hafði sér eiginkonu frá landi utan Evrópska efnahagssvæðisins, hafi ekið með eiginkonu sína í Kvennaathvarfið og tilkynnt starfskonum þar að hann væri orðinn leiður á henni og vissi ekkert hvert hann gæti farið með hana.

Þetta er meðal þess sem kom fram í fréttum Stöðvar 2 í kvöld um það hvernig ofbeldismenn hér á landi velji sér, og skipti út, eiginkonum eftir hentugleika.

Konur utan EES sem hingað koma eru varnarlausar fyrir ofbeldisfullum eiginmönnum því dvalarleyfi þeirra er tengt makanum í fjögur ár eftir komu. Segir í frétt Stöðvar 2 að þetta gefi makanum mikið vald yfir lífi kvennanna.

Þeir geti hótað að senda þær úr landi ef þær verða ekki að vilja þeirra í einu og öllu.

Þetta er meðal þess sem fram kemur í nýrri rannsókn sem kynnt verður í vikunni. Þar er fjallað um aðstæður 67 erlendra kvenna sem leituðu til Kvennathvarfsins síðustu tvö ár.