Það er eitt að kveikja á jólatrénu fyrir jólin en annað þegar kviknar í jólatrénu. En það er einmitt það sem gerðist á jólatréssölu bandaríska verslunarrisans Wal-Mart í Westbury í New York í gær.

Eldur kom upp í jólatrjám fyrir utan verslunina en fjölmenni var að versla inn fyrir jólin þegar atvikið átti sér stað. Verslunin var rýmd vegna eldsvoðans en engan mun hafa sakað í uppákomunni. Rannsókn stendur yfir á orsökum eldsins.

Wal-Mart-versluninni var lokað það sem eftir lifði dags en reiknað var með að hún opnaði aftur í dag.