Háværar raddir eru uppi í Bretlandi um að banna hjólreiðafólki að hlusta á tónlistarspilara á meðan það situr reiðfáka sína vegna mikillar aukningar í banaslysum og alvarlegri slysum sem rekja má til slíkrar iðju.

Ganga menn jafnvel svo langt að kalla þessa tegund hjólreiðakappa iPod-uppvakninga.

Bresku bifreiðasamtökin krefjast þess að breska samgönguráðuneytið setji af stað herferð gegn þessari nýju hættu.

Nýjustu tölur um slys í umferðinni í Bretlandi sýna að 820 hjólreiðamenn hafi látist eða slasast alvarlega á þriggja mánaða tímabili til júní á þessu ári. Það sé aukning um 19 prósent frá sama tímabili í fyrra.

Og hin ýmsu hagsmunasamtök hafa vaxandi áhyggjur af þessu og hafa sett af stað ýmiskonar auglýsingaherferðir til að vara hjólreiðamenn við hættunum sem fylgja því að heyra ekki nokkurn skapaðan hlut af því sem er að gerast í umferðinni í kringum sig.