Það er ekki nýtt af nálinni í knattspyrnustjóraleiknum Football Manager að Íslendingar komi fyrir enda gagngrunnur leiksins gífurlega stór. Hægt er að leika í efstu þremur deildum Íslandsmótsins en til eru nær allir leikmenn sem hafa spilað á Íslandi síðastliðin ár, meira að segja leikmenn úr lítt þekktum þriðju deildar liðum.

Einsdæmi hlýtur þó að vera að sami maðurinn komi tvisvar fyrir í þessum leik sem er einn sá vinsælasti í heiminum. Þannig er það þó með knattspyrnudómarann og framleiðanda þáttaraðanna um atvinnumennina okkar, Gunnar Jarl Jónsson. Gunnar er í leiknum bæði dómari í efstu deild eins og rétt er og þá er hann einnig titlaður sem leikmaður þriðju deildar liðs KB sem hann spriklar með nokkrum sinnum á sumri.

„Þetta hlýtur að vera eitthvert met. Það er spurning hvort maður komist ekki í heimsmetabók Guinness eða eitthvað,“ sagði Gunnar Jarl kíminn við DV.