Frestur Kaupþings til að eignast 87 prósent hlut í Arion banka rennur út á morgun. Fari svo að Kaupþing eignist hlutinn verður ríkið aðeins aðaleigandi Landsbankans að því er fram kemur á vef Ríkisútvarpsins en ríkið á nú fimm prósent hlut í Íslandsbanka. Skilanefnd Kaupþings hefur fundað með kröfuhöfum Kaupþings í London um helgina.

Átta sparisjóðir hafa sótt um stofnfjárframlög til ríkisins, og ef ríkið verður við því renna þeir eignarhlutar einnig til Bankasýslunnar sem fer með hluti ríkisins í fjármálafyrirtækjum.

Einnig verður athugað hvort Landsbankinn geti orðið hæfur til að fara aftur inn á hlutabréfamarkað og er stefnt að því að ríkið hafi losað um sitt eignarhald á bönkunum eftir fimm ár en þá lýkur starfstíma Bankasýslu ríkisins lögum samkvæmt. Frá þessu er greint á vef Ríkisútvarpsins.