Í dag var biskupi Íslands afhentur undirskriftarlisti frá hátt í helmingi atkvæðabærra sóknarbarna á Selfossi sem krefjast þess að nýr sóknarprestur verði kosinn í almennum prestskosningum.

Eins og fram hefur komið var samþykkt á Kirkjuþingi þann 12. nóvember síðastliðinn að sameina Hraungerðisprestakall og Selfossprestakall. Þeir sem mótmæla þessum gjörningi sætta sig illa við það að sóknarprestur Hraungerðisprestakalls taki sjálfkrafa við embætti sóknarprests við sameininguna.

Bendir hópurinn á stærðarmun söfnuðanna. 500 manns búa í Hraungerðisprestakalla en 6.600 á Selfossi.

Eins og DV hefur greint frá færði biskup Íslands séra Gunnar Björnsson úr embætti sóknarprests á Selfossi í embætti sérþjónustuprests við Biskupsstofu í október síðastliðnum. Í kjölfarið var ákveðið að sameina ofangreind prestaköll.