„Þetta er þeirra niðurstaða og þeir reka þarna sjálfstæð samtök. Ég hef komið mínum sjónarmiðum á framfæri og samtökin hafa beðist afsökunar,“ segir Katrín Jakobsdóttir, menningar- og menntamálaráðherra.

Eftir að upp komst að Pálmi Jónsson, fjármálastjóri Knattspyrnusambands Íslands, KSÍ, heimsótti strippstað í Sviss í opinberri heimsókn á vegum samtakanna óskaði Katrín eftir skýrum svörum um hvernig slíkt hafi getað gerst. Fyrir helgi fundaði stjórn KSÍ vegna málsins og þar var ákveðið að áminning til handa fjármálastjóranum væri nægjanleg. Stjórnin bað þjóðina afsökunar á atburðinum og því lofað að settar verði formlegar siðareglur samtakanna. Femínistafélag Íslands, Samtök um Kvennaathvarf og Stígamót fordæma niðurstöðuna.