Norska lögreglan hefur gert mynd opinbera af Íslendingnum sem hefur verið saknað í Noregi síðan aðfaranótt sunnudags. Með birtingur hennar biður lögreglan um hjálp við að finna manninn sem er 180 sentímetra hár, með sítt, dökkt hár og yfirvararskegg. Hann er í dökkum buxum og dökkri peysu með nokkrum litum við hálsmálið.

Maðurinn var í rútu frá Osló til Gol í Hallingdal í Noregi aðfaranótt sunnudags. Maðurinn fór úr rútunni í Noresund rétt eftir miðnætti, sirka áttatíu til níutíu kílómetrum frá áfangastaðnum í Hallingdal. Samkvæmt upplýsingum á norsku fréttasíðunni Dagbladet var maðurinn ölvaður og hefur vínflaska fundist sem talin er hafa verið í eign hans.

Nú telur lögreglan að hún hafi einnig fundið bakpoka Íslendingsins.

Leitin að manninum er umfangsmikil. Starfsfólk norska Rauða krossins tekur þátt og íhugað er nú hvort leitarþyrla eigi einnig að leita mannsins.

Lögreglan telur ólíklegt að keyrt hafi verið á manninn þó hann sé í dökkum fötum.

Á vefsíðu Dagbladet kemur fram að maðurinn tali norsku með íslenskum hreim.