Lögreglan hefur nú staðfest að líkið sem fannst í stöðuvatni fimm til sex hundruð metra norður af Noresund í Noregi í hádeginu í dag sé Íslendingurinn sem hefur verið týndur síðan aðfaranótt sunnudags. Honum var hent út úr rútu í Noresund rétt eftir miðnætti vegna ölvunar.

Samkvæmt frétt á norska fréttavefnum Dagbladet lét rútubílstjórinn lögregluna vita þegar hann henti manninum út. Hann fékk grænt ljós á að yfirgefa manninn þó hann væri ofurölvi. Lögreglan fór strax á staðinn þar sem honum var hent út en þá var maðurinn á bak og burt.

Leit hófst ekki fyrr en aðstandendur mannsins settu sig í samband við lögreglu.