Flokksstjórn Samfylkingarinnar hvetur stjórnvöld til að hvika hvergi frá mótaðri stefnu um innköllun veiðiheimilda í núverandi kvótakerfi með fyrningarleið að því er fram kemur í ályktun stjórnarinnar frá fundi hennar síðastliðinn laugardag. Segir í ályktuninni að leið Samfylkingarinnar með innköllun veiðiheimilda á 20 árum sé sáttaleið, sett fram í þeim tilgangi að koma til móts við þá sem fjárfest hafa í aflaheimildum.

„Hraðari innköllun eða uppstokkun á aflamarkskerfinu hlýtur jafnframt að koma til skoðunar í þeirri nefnd sem vinnur að endurskoðun fiskveiðistjórnunarkerfisins, sem og sú leið að allar viðbótarveiðiheimildir sem ákveðnar kunna að verða umfram þann heildarafla sem ákveðinn var 1. september s.l. verði boðnar upp á markaði þannig að allir útgerðarmenn hafi jafnan aðgang að veiðiheimildunum fyrir það verð sem fæst fyrir þær og tekjurnar renni í ríkissjóð,“ segir í ályktuninni.

Flokksstjórnin leggur áherslu á að nefnd sú sem vinnur að endurskoðun á fiskveiðikerfinu skili niðurstöðu í febrúarmánuði. Markmið jafnaðarmanna er að nýtt fiskveiðistjórnunarkerfi byggi á jöfnum rétti landsmanna til nýtingar fiskimiðanna, að eignarhald fiskveiðiauðlindarinnar liggi ótvírætt hjá þjóðinni og að réttlátur arður af veiðunum renni til fólksins í landinu.