Alls voru 368 kynferðisbrot tilkynnt til lögreglu í fyrra sem eru átján prósent fleiri brot en voru að meðaltali á árunum 2003 til 2007. Gríðarleg fjölgun varð á tilkynntum kynferðisbrotum gegn börnum yngri en fimmtán ára. Á síðasta ári voru þau 102 sem er 81 prósent aukning miðað við meðaltal áranna 2003 til 2007. Árið 2007 voru brotin 79, 55 árið 2006 og 57 árið 2005. Þetta kemur fram í skýrslu um afbrotatölfræði ársins 2008 frá embætti Ríkislögreglustjóra.

Þessar tölur koma Sigríði Björnsdóttur hjá Blátt áfram ekki á óvart. Hún segir það mikinn misskilning að kynferðisbrotum gegn börnum hafi fjölgað. Ástæðan fyrir tilkynningaraukningu sé að umræðan er mun opnari en áður.

„Málin eru til staðar og nú er fólk meðvitað um þau. Samfélagið er farið að taka ábyrgð á því að óeðlileg hegðun er óásættanleg og bregst við. Mér finnst þetta jákvætt þó það sé erfitt að horfast í augu við það,“ segir Sigríður.

Sigríður segir að þessi tala muni eflaust hækka á komandi árum. Hún hvetur foreldra sem gruna að verið sé að brjóta á barni þeirra til að hringja í Barnahús. Ef ekkert er að gert gætu afleiðingarnar orðið skelfilegar.

„Hvað gera þessi börn sem fá ekki hjálp? Þau leggja önnur börn í einelti, beita öðruvísi ofbeldi, leiðast út í áfengis- og vímuefnaneyslu eða vændi. Ef við hjálpum ekki börnum sem hafa orðið fyrir ofbeldi þá finna þau sér farveg eða finna sér leið til að lifa af. Það þarf að vernda börn. Það er hluti af uppeldi. Af hverju eru foreldrar svona litlir baráttumenn fyrir börnin sín? Við, fullorðna fólkið, erum að fá yfir okkur kreppu og mótmælum en það þarf líka styðja við börnin. Við þurfum að finna leiðir til að fræða börnin okkar svo þau verði ekki fyrir ofbeldi.“