Anna Heiðdal, fyrrverandi starfsmaður í eignastýringu Kaupþings, hefur verið kærð til efnahagsbrotadeildar lögreglunnar fyrir meintan fjárdrátt á tugum til hundruð milljóna króna úr bankanum. Fjárdrátturinn meinti á að hafa staðið yfir um nokkurra ára skeið.

Önnu var sagt upp störfum í bankanum í sumar eftir að upp komst um fjárdráttinn en hún hafði starfað þar síðan 2001. Slitastjórn Kaupþings eða skilanefnd bankans kærði málið til efnahagsbrotadeildarinnar eftir að upp komst um fjárdráttinn. Málið er hið fyrsta sinna tegundar sem kemur upp hér á landi eftir bankahrunið, svo vitað sé.

Anna segir hins vegar aðspurð að hún hafi aldrei stolið neinu úr Kaupþingi og að kæran sé bull. „Ég vissi hvorki haus né sporð um þetta fyrr en ég sá þetta í fréttunum í kvöld. Þetta er algert rugl... Þetta dæmi er ekki til,“ segir Anna sem segist ætla að komast að því ásamt lögfræðingi sínum í dag, mánudag, hvernig standi á þessari kæru sem hún kannast ekkert við.