Pálmi Haraldsson segir að Fons hafi aldrei átt eignarhaldsfélagið FS37, sem síðar varð Stím. Mistök KPMG, endurskoðanda Pálma. urðu til þess að í ársreikningi félags í hans eigu kemur fram að Fons hafi átt félagið. Pálmi segist hafa tekið þátt í Stímmálinu því Glitnir hafi leitað til hans og vegna þess að hann gat grætt á viðskiptunum. Hann segir áhættuna fyrir sig og Fons hafa verið enga.

Pálmi Haraldsson athafnamaður, kenndur við eignarhaldsfélagið Fons, sver af sér öll eigendatengsl við eignarhaldsfélagið FS37 ehf., sem síðar var endurnefnt Stím. Hann segir að öfugt við það sem fram komi í ársreikningi félags í eigu Fons, FS38 ehf., frá árinu 2007 hafi Fons aldrei átt FS37. KPMG hefur sent ársreikningaskrá bréf þar sem mistökin eru leiðrétt og farið er fram á það að ársreikningi FS38 verði breytt þannig að ekki komi þar fram að Fons hafi átt FS37, síðar Stím.