Landsbankinn bað um 2,5 milljarða sterlingspunda lán frá Seðlabanka Íslands, jafnvirði 386 milljarða króna, til þess að flytja Icesave reikningana í breska lögsögu.
Þetta kemur fram í nýrri bók Styrmis Gunnarssonar, fyrrverandi ritstjóra Morgunblaðsins, um hrunið og endurreisnina. Bókin ber heitið Umsátrið – fall Íslands og endurreisn.

Blaðið hefur upp úr bók Styrmis, að "Ljóst er af þessum bréfaskiptum, að rekstur Landsbankans, hefur verið kominn í uppnám um miðjan ágúst 2008 og raunar fyrr og í kjölfarið fara fram umræður innan stjórnkerfisins um það, hvernig bregðast eigi við, fari allt á versta veg, og jafnvel kvikna hugmyndir um, að ríkið yfirtaki rekstur bankans."

Landsbankinn fékk ekki lánið og samkvæmt endursögn Fréttablaðsins úr bókinni gerði breska fjármálaeftirlitið (FSA) Landsbankanum ljóst í bréfi þann 15. ágúst í fyrra að innlánastarfsemi hans í Bretlandi yrði stöðvuð ef ekki yrði farið að kröfum þess.
Í bókinni eru tilgreindar þrjár mögulegar ástæður þess að Landsbankinn fékki ekki fyrirgreiðslu Seðlabankans að því er fram kemur í Fréttabalðinu.

„Álitamál var hvort verjandi væri fyrir Seðlabankann að taka lánasafn Landsbankans að veði fyrir svo hárri fjárhæð. Spurning var hvort verjandi væri að halda fyrirgreiðslunni leyndri - en opinberun hennar hefði líklega kostað áhlaup á bankann. Og loks voru tormerki á möguleikum Seðlabankans til að veita slíka fyrirgreiðslu ótímabundið.“