Guðmundur Franklín Jónsson athafnamaður, segist vera kominn með yfir tvö þúsund manns á bakvið sig sem hafa lýst yfir áhuga á að kaupa verslunarfyrirtækið Haga. Guðmundur sagði í Silfri Egils í dag að þetta fólk væri tilbúið að leggja fram pening og kaupa hlutafé í Högum. Hann segist telja að Hagar séu góður fjárfestingakostur og segist ósammála því hvernig Kaupþing hefur komið fram í málefnum Haga.

Eins og fram hefur komið í fjölmiðlum eru viðræður á milli eigenda Haga og Kaupþings í gangi og hefur Kaupþing þegar tekið yfir meirihluta í stjórn félagsins. Gömlu eigendurnir munu þó hafa fengið frest til þess að koma með nýtt hlutafé inn í félagið.

Guðmundur stofnaði vefsíðuna þjóðarhagur.is og þar hefur fjöldi fólks skráð sig að sögn hans. Guðmundur sagði í Silfrinu að hann teldi að með þessu væri hægt að koma hlutabréfamarkaðnum hér á landi í gang, en Hagar væri að hans mati allt of stórt fyrirtæki með allt of margar verslanir.